2017 няншон Хазахстанди хуэйзў жынму җейин таму доли щин Зўгуйди 140 нянди җечини

Ду җыдони, хуэйзўжынди лисы Зўгуйсы Җунгуә. Кәсы җы зу 140 няндыйли таму зэ Хазахстан, Хырхызстан, Узбекистан е җўдини. Замуҗя зэмусы виса хуэймин доли Җун – Яли? Җыгә вынти ги бушоди хуэйзўжынму бу ги нанвын. Щён җыдо тади манфу дэ җыншы хуэйдади жынмуди фур йитян ган йитян дуәдини.
Нянҗин йишан вуйүә 17 – хуэйзўжынди җищён жызы кә зу долэли. Җиннян, 2017 няншон, Җун – Яди хуэйзўжынму җейин таму доли щин Зўгуйди 140 нянди җечи. Җы лён зун до хуэйминшон ю җун-ё йисыди сычин дондор нын чынха тёён шонян чын нэгуйҗяди, щинэ минзў куйчын дэ щёнщүди хо җекур.
Хуэйзў минжынди лисы фужү, гын шын. Юди җедуаншон та буйүнйидихын. Заму ба җыгә да Ф.Поярков, Х.Юсуров, М.Сушанло, И.Юсупов щехади вынҗон дэ фушон җыдони. Йиманди вынҗон дэ фушон фәсы, хуэйзўжынму зэ Җунгуәди Щибый дифоншон 1862 нянди вуйүә 17 туфын-тусы челэ, фанли манчоди җёнсанли. Җы йифонмян лисы куәщүәди бәшы М.Я.Сушанло шәди: «Вуйүә 17 нэйитян Шанщи сынниди лохуэйхуэй челэ, зэ сыни ба җу дўлиди зыху, фанли Манчоди җёнсанли. Шыву нян Щибый дифоншонди лохуэйхуэй зэ Шанщи, Ганьсу, Нинщя, Чинхэ дэ Щинҗён сынни лян данлин шофу минзў фандуйли манчоди фәгуанли».
Нэ шыву нян литу шәхади жынму бузэшо. Манчоди хуоншон фынфуди ба Щибыди йиче хуэйзў, бу шә наннү, лошо җё щёмёни. Ба җыгә кўнан лисы заму бу нын вондё!
Нан архивди цэлё 1877 няншон вон Россияди диҗешон Быйянхў лингуәлэли 3314 жын. Дасыфу – 1116 жын. Мадажын – бонҗер 3 чян жын. Ложынму җищёнди шәсы, нэхур Йинпанниди лохуэйхуэйму няннян вуйүә ги шәдёди Щибый дифоншонди хуэйзўжынму гуә эрмэлидини. Линху юди шанщиму ба җыгә жызы җуандо лайүә 27 нэйитянли – җысы таму доли нэхурди чидокәзыди Токмак чынниди жызы. Вончян чи жынму ба җыгә җищён сычин манмар вондёли.
Кәсы 1990 җи нянди туршон чечў М.Я.Сушонлоди чинщин ба вуйүә 17 – хуэйзўжынди җищён жызы кә хуэйфушонли. Вә җидини, Йинпанни туйихуэй гуә җищён жызыди нэйитян да сыни, тади йүанзыни, футонзыни жынму ду чынбухали. Шудо җәрди җыще жынму гуон бусы бындиди быйщинму, җинян нетешон лэли хошо Хырхызстанди, Җунгуәди кижынму, Хазахстанди йиче хуэйзў дифоншонди зэмусы Алматы, Җямбул дэ Панфиловди дэбёму. Куәщүәжынму, ахунму, кижынму данлинди цанҗя җинян жызыди жынму зэ даҗяди мянчян бёли хуали. Таму на жәщин шәли замуди лисыли, тифәли җищён жызыди чин-юли. Даҗя заннянли хуэйзў бодун сыхуршон шәдёди жынмули.
Вуҗин Йинпанни лян Сортобэди сыни җинян жызышон е гуә эрмэлидии. Җё ңә сылёнчи, мый йигә хуэйзў дифоншон ё цанҗя заму минзўди хо куйчынни. Чечў гуә җинян жызы дэ хуэйзў доли Җун Яди 140 нянди җечи заму ё куанкунди, җуәҗун лян нянчин жынму дэ щүәсынму толүн хуэйзў минжынди җы йиҗеҗер лисыни. Ё чуанлян йүан җуәзы дэ куәщүә-шиҗи дэбёни, гуә дэбё хуэй җёкуәни з.д. Җё щүанҗонди ваму ё җыдони, виса хуэйзўжынму ноли бодунли, бодунди линшужынмусы сый, виса хуэйзў дюли лисы Зўгуйли, таму замуҗя дыйли щин Зўгуйли з.д. Толүн җыще вынти зыю хо, мәю ха, йинцысы хуэйзў минжынди җыгә лисы нын җё мый йигә вава шоншы тади зўзў-быйбыйди йинщүн ганбанни: ви гундо, ви зыю, ви тохуәмин, ви каншу минжынди сычин таму ба хуэйминди минлён, тунйи, туанҗе хан вон җинчынни кунгўли.
Зусы йинви тунйи дэ тунҗе, хуэйзўжынму ба жын шубучўди кўнан мянгуәли, доли щин дифоншон ба зыҗи каншухали. Таму йищин-йиҗи лян бындиди быйщинму, зущён чин дищүнму йиён, йидани щюгэли тэпин гуонйинли, фаҗонли щин Зўгуйли. Щүанҗинди лохуэйхуэй лян тамуди зўбый йиён, җинтян хан шыканди зэ йитуәр җўдини, зу җымуҗя вонщёнди ба гәҗяди чиннён ян, куйчын дэ щёнщү хўшанхани.
М.Х. Джинлиров.