Мый йигә жын ю щинэди сыхурни. Ги йиче шон щүәди ваму, гунзуәди жынму - җысы щехуанди сыхур, дин гощинди сыхур.
Минлён жәту, ганҗин чисый, го лан тян, дин чонди тянчи – җы зусы җүнмый щятянди щянҗи. Зу җыгә сыхуршон зохуа ба йиче янсый ги заёнди цоцор, хуар, фуфур зу дуангили.
Щятян –җүнмый сыхур! Заёнди готян дэ цэфу, заёнди хуарди цуан видо, заёнди чёчёрди чүзы, лю фуезыди щёншын, жәтуди җингуон, фи чуаниди чинлёлёрди фи, ваму лян нёнлозыди щёляр… Сый ба та, щятян, бу щинэ?
Зу щятян сыхур са готян ду юни: щигуа, тянгуа, мо тозы, лигуа тозы, лир, гуәзы, путо, лизы, йинтор зэ хошо данлинди. Сый бу щинэ чы щигуа? Сый бу нэ чы фипуто, гуәзы, лир? Җё ӊә җуәмучи, мәю бу щинэ готянди жын хаба. Зусы щятян сыҗешон зохуа ба йичеди янсый зу щянчўлэли. Заму ба лю тандо, го сан, гәёнди җүнмый хуар, хўтёр, мифыр, фичин зы кан кан бу гу. Зу җы сыҗешон йиче готян дэ цэфу ду зу чынзуәли. Лян фынмый йиён тянди да щигуа, чон хуонтянгуа, ю види тозы дэ хын, лю, хуон, хунди гуәзы, фи путо, хи лизы, хун йинтор, пяр, фумый зэ хошо данлиди готян.
Щятян – җысы гощин, нанхуә дэ вонщён. Зу щятян сыхур ю дин чонди щехуанни. Бу шә нён-лозыму, ваму ду лян зыҗиди җящя, лян пын-юму зэ фулинни, санни, хэзыни, заёнди гуйтуму ду нын лон дэ щехуан. Җы ха бусы йүнчима? Зу җыгә сыхур, сынхуә до жынму гынчян шызэ ходихын!
Замуди гуйни ю хошо җүнмый щехуанди дифонни – нанцон ёдун (таинственные пещеры), дефи (водопад), го сан, дабан (перевал), фулин, сатан зэ хошо данлинди. Даҗяди вонщён ба йиман чигуэди дифон лонйихар!
Дин щинэ щехуанди дифон зусы го сан. Щятян сан готу тэ футандихын: чисый ю ганҗин, лю фу, чинлёнлёрди фи, лён фынфыр – шызэ чинщюдихын. Да го сан диндиршон ба тайүарниди суй хә дэ фичуан, ба лю фулин, заёнди хуар канҗян щинни гощин ду чынбухали. Зу зэ җәр жынму зуди заёнди вуку чыди, шоди гунгурди ца, лян чы дэ ламә, дэ щехуан…
