Сыхур вонгуә фидини, йүн бу җю зан.
Зусы сый е донбучў, йүә фи, йүә йүан
Щёнче та зу кўтуәли, нянҗин мә ган
Мучин дазо вучонли, ба эр мә җян…
Вуйүә чў 9 – Дыйшын җечи. Чуан шыҗе ду шәлүди җейин җыгә йибыйзы вонбулёди, щинэди зэмусы ги личиди җечи.
Шыҗешон мәю йигә жын сый ба Вида Зугуй җон җыбудо. Кәсы, таму мә сылён гуә - җыгә Дыйшын замуҗя долэли.
Җон… Тинҗя җы йи җү хуа мый йигә жынди щин зу җизокэли, ю хэпа дэ сынза.
Мый йигә җон – җысы вучон, нянлуй, нянхуон (голод), ласан (разруха). Та ги жынму чўгуә шощин, пәфан, юцу, етим ваму дэ нянчин гуафу, нёнлозыди шәхо (потеря) зэ са ду мәю. Дин дади зэмусы далансанди җон зусы Вида Зўгуй җон да 1941 няншон йичыр до 1945 няншон.
Гуон тинҗян эрбый дуә ван шәхади жынму щинни җюди тэ тын. Зу җы сы нян литу дуәйибанзы минзўди жынму шу лян шу, ту дуй ту зы вончян пули, щянли тамуди йинщүнди бынсыли. Мә шә ло-щё, нан-нү, суй-да, ду занли да җинли, фили гукўли. Сый фын йифули, сый хи-мин зэ гунчон зули хуәли, сый ги бинйүн (солдат) гили бонцули…
Җыгә Вида Зўгуй җон ги мый йиҗязы бу шә суй щёнҗуонма, да чынпума ба нянлуй дэ шәхо ду нанэли.
Җысыма, 81нян фигуәли, кәсы җищён фанчон лян заму йитун зудини… З.Восинбо зэ зыҗи фущин литу ги щинэди Тэе щели: «Ба ни Тэе, ӊә зэ щёнпяршон гуон җянли. Җяниди йиман жынму ду кын шә ниди да җон сыхурди йинщүн габан, ӊәди нана кын шә җоншонди йичеди сынза, хэпа дэ винан, шә ниму заму ба йиче җин заншон бохўли Зўгуйли, замуҗя ни дэли лёнхуэй шон зэмусы ниди фущин литу щехади щинҗиди хуа.
Тэе, ба ниди йиче шонхому дон йиняр ду каншудини! Виса җёнҗон (медаль) лян щүнҗон (орден) бу хуэй шә хуа? Таму зэ хуэй шә хуа ба ниди йинщүн ганбан ги хубый титирди зэ бу шәйихама…
Тэе, ба ниму, Шонҗонди жынму, хубый фанчон зэ җунщинни җищёндини! Ба ниди Йинщүн ганбан, йибыйзы ду вонбулё! Хубый ба Дыйшын замуҗя доли замуди гынчян, фанчон дон йиняр каншунни! Зусы шыҗешонди жынму ду ё Дыйшынни! Дашын, ги ниму, шә җы җи җү хуа: «Зэ каншу Дыйшын сычиншон, хубый зу ба йиче лилён заншон ба та каншучўни, хўшанхани!»
Тэе, ни щинфуди, җонда ӊә чынха җышы годи, ю хо тёёнди жынни. Ба хуэй фущин җёиин бушонди йимяр ӊә тэ пәфандихын, кәсы җы бусы җун - ёди.
Җун-ёсы ба ниму йибыйзы вонбулё!» Җымугә фущин тэ дуәдихын…
Йинви җыгә заму ду ё ги шон җонди жынму чынщин до щенни. Ба тамуди Йинщүн ганбан сўчон (постоянно) ги хубыйди нянчинжынму ё тифәни зэмусы зу билүнни.
Зу җо җыгә кухо няннян Вуйүә чў 9 шыҗе ду на жәщин гощинди дэ пәфанди җейин җыгә Вида Зўгуй җечидини.
Нян, кан шонли җонди жынму щехади фущин, юбудый нянлуй зу вонха тонли. Таму кын ще җымуди хуа: бу шә хи-мин, бу шә жә-лын, таму зы вончян зу пули, бохўли Зўгуйли. Мәю щян гунфу, чы бо дўзы, фи хо җё, щехуан. Тянтяр вумый лян вучон йүмяндини. Канҗян шәхади жынму щинни тынди шәбулэ… Зу дуәму наншу еба, ба йиче җин заншон зы вончян ё зуни…
Ба нёнлозыму, зымый дэ дищүнму, чинжынму, щинэди ваму дан сылёнчелэ йичеди винан е зу мәюли, ба йиче җин заншон зы вончян зу пули е зу бу хэпа вучонли…
Ба тамуди щинди хуа замуҗя нын вондё? Ба тамуди хэпа, сынза замуҗя нын вон? Ба тамуди вучон заму нын вондёма?
Ба җыгә чүзы зочянди «Хуэймин бо»
бянҗи Дўвазы Бехазы Рахманович байир ги
«Мансузы Вонахун» дянйин фанхади.
(Хуасы Расул Гамзатовди,
йиндёсы Ян Френкельди)
Вә юйиха җүәмуди да җонкушон
Мә җуанхуэйҗяди замуди бинйиүн
Мә шындо хун ще сынхади тяндони,
Ду, бянчын бый ян, фидо йүан кунҗун.
Таму да нэ сыхур до җирди җызы.
Фиди, ба жын канҗян, дашын җёхуан.
Ни фә, виса щинни за җыму пәфан,
Заму гуон вон тян йи җү бу янчуан.
Фа лихуаҗян бу хуон, бу мон зэ тяншон,
Зэ вучи литу фидини вончян.
Таму җунҗянни ю йигә щян кункур,
Ба нэгә вифын, данпа, вә ё җан
Сыхур йидо, вә е бу танман фуни
Зэ лан тян янву литу гын лихуаҗян.
До го тяншон, лян ян йиён вә хан
